Maður hlýtur að velta því fyrir sér hvort þetta er ekki líka rétta leiðin til að fara með kvótakerfið. Nú þegar kvótahafar hafa nánast haldið landinu í gíslingu í tvö ár og náð nýjum hæðum í skemmdarverkum sínum, með fulltyngi SA, í kjaraviðræðum undafarið.

“Íslenska leiðin” væri sú að klippa á hnútinn, láta þá taka skellinn sem komu sér sjálfir í óefni með því að kaupa kvóta af einhverjum sem aldrei höfðu átt þá. Mönnum sem þóttust eiga kvótana, þó landslög segðu annað. Mönnum sem reyndu að slá eign sinni á þá. Kvótahafar eru auðvitað ekki þjófsnautar og þess vegna eiga þeir heldur ekki þessa kvóta. En þeir vor gráðugir kjánar að halda að þeir kæmust upp með að slá eign sinni á kvótana. Þeir gerðu mistök. Þeir eiga að borga fyrir þessi mistök sjálfir.

Íslenska leiðin bendir til þess að okkur muni farnast best með því að láta tjónið bitna á þeim sem tóku áhættuna. Hún segir okkur að þannig verði fljótlegast og sársaukaminnst að byggja aftur upp traustan sjávarútveg, þjóðinni til velfarnaðar.

Hérna er hlekkur á tillögur um fiskveiðistjórnun sem ég og fleiri lögðum fram fyrir stuttu. Þarna eru að vísu hugmyndir um að draga úr því tjóni sem kvótahafar verða fyrir vegna breytinganna. Ef maður íhugar íslensku leiðina, þá er það kannski rangt.

Fyrirlesturinn minn fjallar um hugtakið sjálfbærni, hvernig það er skilgreint og hversu mikið vantar upp á að kvótakerfið taki mið af hugmyndum alþjóðasamfélagsins um sjálfbærni. Nálgast má fyrirlesturinn hér.

Kerfið er einfalt og auðvelt að koma því á. Engu að síður er hægt að þróa það og bæta í framtíðinni. Tillögurnar má lesa hér.

Við höfum reyndar gott veganesti þar sem eru störf okkar fyrir sveitarfélagið. Rangfærslur í grein á Skutli í gær um að minnihlutinn gæti að kynjahlutfalli við skipan í nefndir eru dæmi um það hvernig gefa má skakka mynd af raunveruleikanum. Fólk getur kynnt sér þessar nefndir á vef Ísafjarðarbæjar.

Rangfærslur um málefni eldri borgara eru annað dæmi um slíka raunveruleikabjögun. Þar höfum við einmitt verið að standa okkur mjög vel á flestum sviðum, þó vissulega vanti enn nýtt hjúkrunarheimili. Þeir sem kynna sér málin komast fljótt að hinu sanna.

Ég og samflokksfólk mitt erum ekki að fara að gera nein stórkostleg kraftaverk. Við höfum fyrst og fremst hugsað okkar að vanda til allra verka. Kannski endar það samt með einhverjum smáum kraftaverkum þegar upp er staðið.

Auk skólamála og annarra menntamála er fjölmörgum félagslegum málefnum sinnt af Skóla- og fjölskylduskrifstofu. Helstu verkefni skrifstofunnar eru að halda uppi öryggisneti velferðarsamfélagsins, sinna ýmsum málefnum aldraðra og barna og jafnréttismál. Um næstu áramót munu svo málefni fatlaðra bætast við þessi verkefni.

Félagsauður

Það er kjarni sjálfstæðisstefnunnar að virkja þann kraft sem í fólki býr og byggja með því heilbrigt og kraftmikið samfélag. Lykilhugtak í félagsmálastefnu bæjarins, sem mótuð var á liðnu kjörtímabili, er hugtakið félagsauður, sá auður sem verður til í samfélagi þegar fólk á í greiðum og skapandi samskiptum. Að efla og nýta þennan auð sem í samfélaginu býr gerist m.a. með því að greiða fyrir samskiptum fólks og auka skilning þess á aðstæðum hvers annars. Einnig er mikilvægt að hvetja einstaklinga til ábyrgðar á eigin lífi og vinna að því að auðvelda þeim að taka virkan þátt í samfélaginu. Með þeim hætti ætti enginn að þurfa að vera byrði á samfélaginu heldur geta allir verið máttarstólpar á sinn hátt.

Málefni fatlaðra

Málefni fatlaðra er mjög stór málaflokkur og mikið liggur við að vel takist til við flutninginn um næstu áramót. Vonast er til að bæta megi þjónustu enn frekar og að möguleikar skapist til að laga hana að þörfum notenda með hliðsjón af ólíkum aðstæðum. Einnig á með flutningnum að tryggja að eitt stjórnsýslustig beri ábyrgð á stærstum hluta almennrar félagsþjónustu, að samhæfing verði bætt og dregið úr skörun ábyrgðarsviða stjórnsýslustiga. Með flutningnum er jafnframt vonast til að sveitarstjórnarstigið styrkist og verkaskipting milli ríkis og sveitarfélaga verði einfölduð.

Sjálfstæðismenn í Ísafjarðarbæ leggja ofuráherslu á sem átakaminnsta tilfærslu þegar flutningurinn á sér stað. Ekki á að umturna þjónustunni sem gengur að mörgu leyti mjög vel. Fyrst og fremst þarf að tryggja að kunnáttu og reynslu verði viðhaldið og þjónustan haldi snurðulaust áfram. Við munum því eins og kostur er óska eftir starfskröftum þeirra sem nú starfa í greininni.

Aldraðir

Áframhaldandi þróun heimaþjónustu aldraðra og samþætting heimaþjónustu og heimahjúkrunar eru mikilvæg framfaramál. Þetta er liður í þeirri stefnu sem nú vex fiskur um hrygg í íslensku þjóðfélagi, að draga úr stofnanavæðingu og gera fólki kleift að búa sem allra lengst í eigin húsnæði. Verið er að vinna í þessum málum á vettvangi félagsmálanefndar og verður spennandi að halda því verki áfram.

Þrátt fyrir þessa þróun mála er nauðsyn á byggingu hjúkrunarheimilis. Þar þarf ríkisvaldið að koma að málum. Lengi hefur verið þrýst á um að því máli verði þokað áfram og vinna lögð í að afla skilnings á þörfinni. Áfram þarf að leggja mikla áherslu á að vinna málinu framgöngu þannig að hér rísi hjúkrunarheimili á næsta kjörtímabili.

Kraftmikið tómstundastarf aldraðra er liður í auðugra samfélagi. Því er mikilvægt að reynt sé að efla það með tiltækum ráðum. Nú hefur verið samþykkt að félag eldri borgara á Ísafirði fái húsnæði í kjallara Hlífar, þá hafa einnig verið kynntar metnaðarfullar hugmyndir um dagvist aldraðra sem ganga út á að virkja þátttakendur eins og kostur er.

Börnin

Eitt allra mikilvægasta verkefni okkar er að gæta að velferð barnanna. Þjónusta við þarfir þeirra, almennar og sérstakar, og ráðgjöf og fræðsla til foreldra eru atriði sem við þurfum að leggja áherslu á. Forvarnir eru mikilvægar og þar er þátttaka í íþróttum og félagasamtökum vænleg til árangurs.

Samstarfið sem tekist hefur á milli bæjaryfirvalda og Héraðssambands Vestfirðinga, HSV, hefur vakið athygli á landsvísu. Þetta samstarf byggir á grunni samstarfssamnings Ísafjarðarbæjar og HSV. Á síðasta héraðsþingi HSV sáu aðildarfélögin sérstaka ástæðu til að þakka hið góða samstarf. Frekari þróun starfsins er fyrirhuguð og teljum við að þarna sé sannarlega rétti vettvangurinn til að verja þeim fjármunum sem við látum í forvarnir og æskulýðsstarf.

Velferð íbúa

Mig langar að birta hér niðurlagið úr stefnu Ísafjarðarbæjar í félags- og velferðarmálum:
Kjarninn í markmiðum þessarar stefnu er ósk um velferð og farsæld íbúa Ísafjarðarbæjar. Allir íbúar eiga kröfu til fullra mannréttinda og jafngildrar þátttöku í samfélaginu. Með stuðningi, fræðslu og forvörnum má stuðla að lífsgleði og heilsu íbúanna og þar með efla félagsauðinn sem er hornsteinn samfélagsins.

Lífsgleði er eitt af grunngildum góðra lífskjara. Með hvatningu og félagslegum stuðningi má efla þátttöku og virkni í samfélaginu. Virkni einstaklinga er best til þess fallin að rjúfa félagslega einangrun.

Í umhverfi Ísafjarðarbæjar er gott framboð á leiðum til hreyfingar og útivistar. Með fjölbreyttu framboði á tómstundum og annarri afþreyingu ásamt þátttöku íbúanna verður best stuðlað að bættri lýðheilsu.

Mikil uppbygging hefur átt sér stað á höfnum Ísafjarðarbæjar á liðnum árum. Það helgast fyrst og fremst af því að ríkisstjórnin setti á svokölluð sólarlagsákvæði um fjármögnun hafnarframkvæmda. Í því felst að ríkið hyggst hætta þáttöku sinni í hafnarframkvæmdum en tekur um 60-70% þátt í þeim fram að því. Fresturinn sem ríkið hefur gefið hefur þó verið framlengdur ár frá ári. En af þessum sökum hefur bæjarstjórn lagt mikið fé í hafnarframkvæmdir á síðustu árum meðan mótframlag ríkisins býðst. Það kom líka fram í máli hafnarstjóra að mikið liggur við að við sinnum viðhaldi þeirra miklu hafnarmannvirkja sem eru í Ísafjarðarbæ. Því viðhaldi hafði verið illa sinnt í lok síðustu aldar og því af miklu að taka við val verkefna. Það er rétt hjá Mugga að við megum ekki láta þessi mannvirki drabbast niður.

Muggi ræddi um farþegaskipakomurnar, en þeim hefur fjölgað gífurlega á undanförnum árum. Einn af okkar draumum er að dýpka og breikka rennuna inn á Pollinn þannig að stóru farþegaskipin geti lagst við Ásgeirsbakka. Það mundi færa okkur mun meiri tekjur af þessum skipakomum. Viðræður hafa átt sér stað við samgönguyfirvöld um þessi mál og líka um gerð varnargarðs í norður frá olíumúlanum. Slíkur varnargarður myndi verja betur skemmtibátahöfn við Edinborgarhúsið. Með öðrum garði á móti suðurfrá Torfnesi mætti svo verja Pollgötuna fyrir ágangi sjávar og þá væri jafnframt komið þar frábært lægi fyrir stóra skemmtibátahöfn. Það er draumur sem við ætlum að vinna frekar í að skipuleggja með bæjarbúum á næsta kjörtímabili. Svokallað Torfnesrif gæti verið hluti af slíkri framtíðarsýn.

Á fundinum ræddum við einnig um hugsanlegt samstarf við Bolvíkinga. Það þarf ekki að koma til sameining sveitarfélaganna til þess að hægt sé að auka samstarfið verulega. Það mætti hugsa sér að hafnirnar yrðu reknar í einu rekstrarfélagi, hafnasamlagi. Það gæti eflaust leitt af sér hagkvæmni að hugsa málefni þessara hafna heildstætt. Slíka hluti verður að skoða gaumgæfilega, sérstaklega þegar hart er í ári.

Það er altént ljóst að þó mikið hafi verið unnið þá eru næg verkefni til staðar og mörg þeirra gætu verið býsna skemmtileg.

Á föstudaginn byrjar svo hin pólitíska stemming. Sturla Böðvarsson ætlar að koma á súpufund hjá okkur í hádeginu á föstudag og ræða við okkur um fjarskipta- og samgöngumál. Fá málefni eru jafn mikilvæg Ísafjarðarbæ og fáir eru jafnfróðir um þau og Sturla. Það er mikilvægt veganesti fyrir verðandi bæjarfulltrúa að ræða þessi mál og brjóta til mergjar eftir því sem kostur er. Hver veit nema í súpuna verði mættur kræklingur af svæðinu.

Á laugardagsmorgun klukkan 10:00 verður svo fyrsti Heiti potturinn í þessum kosningum. Við sjálfstæðismenn í Ísafjarðarbæ höfum lengi haft það fyrir sið fyrir sveitarstjórnarkosningar að bjóða fólki til funda milli kl. 7:00 og 8:00 að morgni nokkra virka daga til að ræða pólitísk málefni sem brenna á fólki. Þessa fundi höfum við kallað Heita potta. Við höfum svo stundum haft þessa fundi á öðrum tímum, en samt kallað þá Heitu pottana.

Heiti potturinn á laugardaginn verður um hafnarmál og komur farþegaskipa í bæinn. Sérstakur gestur fundarins verður hafnarstjórinn okkar, hann Muggi. Það ættu að geta skapast líflegar umræður, enda höfum við sjálfstæðismenn glæstar vonir í þessum efnum eins og sjá má á stefnuskránni okkar. Við viljum byggja upp sjósportmiðstöð í Ísafjarðarbæ og skemmtibátahöfn við Pollinn. Allt tekur þetta þó tíma og þarf að fá góðan undirbúning og virka umfjöllun meðal bæjarbúa.

Árið 1996 bauð Fönk-listinn fram í Ísafjarðarbæ og náði frábærum árangri. Þá var öldin önnur. Að vísu var þar um að ræða mjög frambærilegt ungt fólk sem hefur plumað sig ágætlega eftir það. En það var fleira sem stuðlaði að góðum árangri Fönk-listans og e.t.v. svipaðir hlutir og nú hafa áhrif á velgengni Besta flokksins í Reykjavík.

Á þeim árum hafði Ísafjörður lengi þurft að glíma við sífelldan klofning og rifrildi í bæjarstjórnum sem oft virtist eiga best heima í sandkassa. Margir kjósendur voru því að lýsa óánægju sinni með vinnubrögð og samstarfsleysi sveitarstjórnarmanna. Fönk-listinn fékk líka yfir 20% atkvæða og tvo menn kjörna.

Nú er öldin önnur í Ísafjarðarbæ. Sambærilegur rígur og að ofan greinir hefur sést í nokkrum sveitarfélögum á Íslandi. Í Ísafjarðarbæ hefur ríkt friður og ákaflega gott samstarf frá því 1998 þegar núverandi meirihluti sjálfstæðismanna og framsóknarmanna tók við stjórn bæjarins. Stundum hefur jafnvel náðst gott samstarf við minnihlutann, en reyndar ekki á þessu kjörtímabili þó boðið hafi verið upp á það.

Bæjarfulltrúar sjálfstæðismanna í Ísafjarðarbæ hafa ekki tekið þátt í þeim skrípaleik eða hrunadansi sem víða hefur tíðkast annarsstaðar í landinu. Við fjárfestum ekki í sundhöll þó okkur hafi langað. Við höfum sýnt stillingu. Við vitum að við getum gert betur en ætlum áfram að feta af stillingu þann þrönga stíg sem erfiðar aðstæður í efnahags- og atvinnuþróun Vestfjarða hafa markað okkur.

Í dag hefst barátta okkar sjálfstæðismanna í Ísafjarðarbæ fyrir sveitarstjórnarkosningarnar 2010. Við munum opna kosningaskrifstofuna við Silfurtorg klukkan 17:00 og bjóða fólki í spjall og rjúkandi vöfflur.

Mikið liggur við að við náum að gefa íbúum rétta mynd af því hve mikilvægt það er að sjálfstæðismenn verði við stjórnvölinn eftir kosningar. Við höfum eftir fremsta megni reynt að stunda fagleg og fumlaus vinnubrögð og rasa ekki um ráð fram.

Auðvitað hefði verið gaman að byggja nýja sundlaug og nýtt hjúkrunarheimili. Í ljósi efnahagsaðstæðna hefði það þó haft skelfilegar afleiðingar í för með sér ef meirihlutinn hefði ekki stigið varlega til jarðar í þeim efnum. Við hyggjum að sjálfsögðu á byggingu hjúkrunarheimilis en viljum þó tryggja aðkomu ríkisins áður en hafist verður handa. Minnihlutinn vildi hefjast handa við byggingu þess á þessu kjörtímabili fyrir hundruð milljóna, algjörlega á okkar eigin reikning og ábyrgð.

Minnihlutinn vildi í vetur einhenda sér í endurnýju Funa. Verkefni sem kostar 350-500 milljónir. Þarna töldum við rétt að staldra við og íhuga málið betur. Eru e.t.v. til hagkvæmari leiðir? Eru e.t.v. til aðrar leiðir en að kveikja í öllu draslinu? Þetta viljum við skoða því að þróun í meðhöndlun og förgun sorps er nú hröð og kröfurnar aðrar en fyrir 20 árum.

Auðvitað hefðum við viljað grobba okkur af nýrri sundlaug. Auðvitað væri gaman að geta boðið fría leikskóla. En við sjálfstæðsmenn höfum sett það í 1. sæti að standa traustum fótum. Standa í lappirnar! Verkefnið sem við erum í er að byggja okkur framtíð, e.t.v. hægt, en af festu og öryggi.

Við getum séð árangurinn af þessu starfi ef við kærum okkur um.